國產凌凌漆

与某妓女嘅对话?

同达闻西嘅对话?

司令传达室与杜鹃嘅对话?

布置任务?

去错丽晶酒店

凌凌漆嘅房间?

入住酒店?

李香琴屋企?

初显飞刀绝技?

阿琴屋企嘅洗手间里面

去赖有为屋企前

赖有为屋企

睇咸片攞子弹

喺刑场上

最后决斗

尾声

与某妓女嘅对话

外景：深圳某一市场猪肉摊前。

某女甲：你以为你匿喺度就揾唔到你咩？冇用架！你啲咁出色嘅难忍（男人），无论喺边度，都好似漆黑中嘅萤火虫一样，咁鲜明，咁出众。你忧郁嘅眼神，唏嘘嘅须根，神乎其技嘅刀法，同埋嗰杯DryMartine，都彻底噉将你出卖咗。不过，你虽然系咁出色，始终行有行规，无论典（点）你都要找埋寻晚嗰条过夜数，叫鸡唔使畀钱呀？

凌凌漆：我重估我哋嘅交往系建筑喺感情之上，估唔到，原来都系一盘生意。

某女甲：讲感情都要畀钱架。

凌凌漆：明白嘅，有一早畀咗你啦。但系近排兴食斋，冇乜人帮衬，不如噉啦，攞篘猪肉返去顶住数先啦。嚟吖，粗粗地，唔该。

某女甲：你好嘢，山水有山逢。（某女甲提猪肉转身走。）

凌凌漆：

有兴趣嘅不如今天再相逢啦。

（某女甲把猪肉投向凌凌漆）

凌凌漆（用刀接住猪肉）：悭番。（顺势将猪肉切成两半，挂喺猪肉钩上）

某女乙：咩话？个衰佬唔肯畀钱？我帮你拖马喐佢！

某女甲：算啦，话到尾，佢始终都系一个独一无二、风度翩翩嘅猪肉佬。

（阿漆依着猪肉摊，品着白兰地。）

同达闻西嘅对话

（达闻西提住菜蓝，踏住积水而来，见到阿漆，突然停住，摆出架势。）

达闻西：力拔山兮气盖世??

凌凌漆（酒杯落地而碎）：时不利兮骓不逝。

达闻西：阿漆。

凌凌漆：闻西。

达闻西：我都系希望你叫番我全名——达闻西。

凌凌漆：冇问题吖，闻西。

达闻西：多谢。

凌凌漆：唔好客气，闻西。

达闻西：国家终于有任务畀你喇。

凌凌漆：系咩？

达闻西：嗯。

凌凌漆：终于都肯揾我嘞咩？（举刀将砧板劈开）

司令传达室与杜鹃嘅对话

（一女子正化妆。凌凌漆背后插刀，头戴礼帽，口含香烟。顺手将帽飞到衣架上。）

凌凌漆：点啊，玫瑰？瑰，十年冇见都重

系咁靓。

杜鹃：我唔系十年前嘅玫瑰呀，她喺上年过咗身喇，我系佢个女杜鹃。

凌凌漆：（惊讶地）咁大个女喇？嚟，畀叔抱吓先！

杜鹃：嗯—，迟啲先啦！司令等咗你好耐喇。

（柜子移开，一道门显露出来）

杜鹃：你入去先啦。

凌凌漆：好，叔叔好快返嚟呀。

杜鹃：好啊。

凌凌漆（快到门口，将猪肝掉到杜鹃桌上。）：嚿猪膶攞去滚滚汤，补补血吖。（一回头，撞落玻璃门度，一张扭曲嘅脸。）

杜鹃：你太耐冇返嚟喇，都唔记得有度玻璃门。

布置任务

（密室内，人员都好忙做紧嘢，凌凌漆睇

见司令，行过去）

凌凌漆：（敬礼）司令！

司令：凌凌漆，你嚟喇。

（警卫走过来）

警卫（敬礼）：呢度唔准食烟架。（阿漆将烟头喺警卫手中揿熄）

警卫：唔准带武器啊。

凌凌漆：哎，对唔住，作为一个刀客，刀不离身。

司令（对警卫）：（普通话）算了。（对凌凌漆）刀客？哈哈??

凌凌漆：等咗十年，我重以为国家经已忘记咗我添。

司令：点会呢？就算系一张厕纸，一条底裤，都有佢本身嘅用处加嘛。

凌凌漆：呢个比喻真系一流！我已做好准备，接受任何工作。

司令：（普通话）好！有道是养兵千日，

就用在一时。（粤语）最近我哋发现咗世界上最大嘅暴龙化石，（实验开始，在实验各种稀奇古怪的杀人武器）但系恐龙头唔见咗。偷盗嗰个人嘅身份系相当嘅神秘，嗯，我哋净系知道佢用嘅系一支无坚不摧嘅金枪，同埋身上着有一副刀枪不入嘅盔甲。呢个价值连城嘅国宝，我哋怀疑同香港嘅走私大王赖有为有关。所以我哋派你去调查。

凌凌漆：噉有冇睇猪罗公园？

司令：冇。侏罗纪就睇过。

凌凌漆：啱，系侏罗纪。暴龙究竟系鬼鬼崇崇走嚟走去嗰条定还是“哈—哈”嗰条呢？

司令：系“哈—哈”嗰条。

凌凌漆：咦，嗰条好冇人性，专追啲细蚊仔嚟咬个噃？

司令：唔会，肯定中国呢条唔会。

凌凌漆：哦——。

司令：（普通话）我们特意找来了十年前训练你的那个达闻西做你的后勤。（粤语）嘿，闻西——

（达闻西屙完尿，转番身，敬礼）

闻西：司令，系达闻西。

凌凌漆：闻西，进行成点啊，闻西？

闻西：我最近发明咗几样新嘢，相信可以帮到你。（闻西从背后攞出一件样嘢）

凌凌漆：电筒？

闻西：错，呢支唔系普通嘅电筒，呢支系唔使电心嘅太阳能电筒，喺有光源嘅时候佢会着??

司令：噉如果冇光??

闻西：绝对唔会着。

凌凌漆：有冇可能冇光都着呢？

闻西：问得好，熄灯。

工作员：系。（熄灯）

闻西：只要攞另外一支电筒出嚟，照住佢，佢就会着架喇。（用另一支电筒照住原来支电筒）嗱，系咪呀？

司令：开灯。

工作员：系。（开灯）

凌凌漆：呢个发明几有创意吓。

司令：嗯。

闻西：嗱，大家睇吓嗰便个守卫，我就当佢系金枪人。

（闻西攞出一个神秘嘅皮箱，极其严肃地装上四个箱脚）

闻西：呢张系超级间谍凳，系畀人坐喺度长时间监视敌人用嘅，（指住警卫）我问你怕未？

（警卫扭转个头）

闻西：嗱，怕咧，系咪呀！

凌凌漆：呢个发明都几劲。

司令：（普通话）不错。

闻西：重有，我家下研究紧一种集合十种杀人武器于一身嘅超级武器霸王。若果畀我实验到呢，噉就??

司令：阿闻西，有乜嘢，去到我办公室再倾啦，吓。

闻西：（一路行一路讲）阿漆，呢十年你一直做猪肉佬呀？

凌凌漆：应该话系一个唏嘘嘅猪肉佬。

闻西：我何尝唔系一个坎坷嘅卖菜仔呢？好采有份兼职，喺中央精神病研究所做研究工作。

司令：负责做啲咩？

闻西：畀人研究。

司令（点头）：（普通话）不错。

司令：凌凌漆，你要记住，龙头骨标志住我哋国家嘅尊严，绝对不容许落喺外国人嘅手上，追查过程中你嘅身份要绝对保密。重有，金枪人嘅身份系极之其神秘嘅,而且心狠手辣，你随时会有生命危险。凌凌漆，你重有咩问题？

凌凌漆：可唔可以唔去？

司令：唔得，听日一早你就要出发，到咗香港之后，就有人同你接头。

凌凌漆：系。

司令：重有冇其它事？

凌凌漆：冇。

司令（攞出一沓钱，抽出最底两张大嘅）：呢个系我私人赞助你嘅二百文，好好地买番件衫先去香港，唔好丢我哋国家嘅面。

（凌凌漆攞住钱，喺闻西面前扬，闻西瞪大只眼睇住）

司令：闻西！

闻西：系。

司令（抽出最上五毛钱）：去同我买杯奶茶，记得找钱啊。

闻西：系。

凌凌漆：闻西，司令，今次我要为国争光呀得。

闻西：讲得好，好兄弟！

凌凌漆：好兄弟，讲得好！

闻西：好。

（凌凌漆咚一声又撞落玻璃门，跌低落地）

凌凌漆嘅房间

凌凌漆喺自己房内打扮，台上放住19xx年版间谍手册，社交英语速成。

凌凌漆用风筒吹头，之后手持手枪，摆咗个好有型嘅007姿势。

去错丽晶酒店

（凌凌漆穿一身黑衣，头戴礼帽，手提皮箱，款款而来。字幕：香港）

（凌凌漆同一女子好似有说有笑步入酒店。女子见到熟人停住，凌凌漆径自走到总台前。凌凌漆盯看酒店内女人嘅性感形象，睇到入晒神）

酒店服务员：CanIhelpyou,sir?

凌凌漆：系啊，yes，well，我经已book咗房。

酒店服务员：请问贵姓呢？

凌凌漆：Mynameis凌凌漆。

（一个鬼妹经过，想凌凌漆打招呼，漆回以挑逗眼神）

酒店服务员：唔好意思啊，冇你个名喎。

凌凌漆：咩话？有噉嘅事？（从袋里面攞出一张地址递畀服务员）请你查真啲吖。

酒店服务员：哦，对唔住啊，你book嘅唔系丽晶酒店，你book嘅系丽晶大宾馆。

（镜头转向一间破旧嘅招待所，凌凌漆仰望到丽晶大宾馆破落嘅门牌，皮箱不觉落地）

凌凌漆：Shit！

入住丽晶大宾馆

（凌凌漆由一“女”领班（又系男扮女嘅专家李健仁）领住，进入一房间）

领班：老细，见你咁有型，又戴帽又盛噉样，呢间房收呢七十啦，每日十二点钟前checkout啊，吓。

（凌凌漆环顾房间，在桌上发现一本色情

杂志，揵开中间页，见系一裸体女郎）

领班：喂，戴副立体超睇吖，过瘾啲架。

凌凌漆：系咩？（接过立体眼镜睇，裸女胸部大咗好多）哦——

领班：点啊？得唔得啊？

凌凌漆：得，不过呢味嘢，我唔系好啱架。

领班：噉你叫唔叫鸡吖？

凌凌漆：好呀，咩质素吖？

领班：有北姑有陀地，百五文全套。

凌凌漆（谂咗一阵）：试吓陀地吖。

领班：好啊。（开始踎低除凌凌漆条裤）

凌凌漆：阿婶，你喺度做咩啊？

领班：我帮你脱裤啰。

凌凌漆：点解要噉做呢？

领班：你要陀地吖嘛，我喺呢区起晒朵架啦。

（听到一拳，领班应声倒地。忽然水龙头打开，凌凌漆论尽地攞出枪，喺空中乱抓几次先攞稳，一阵白雾升起，喺空墙上写住：“正午三角公园见，红玫瑰为记”）

李香琴屋企

（阿漆食住支烟，环顾房间，阿琴唱住歌）

凌凌漆：香港美女多，我睇你都好有爱心喎，你经常喂嘢畀啲狗食吓。哎，乜你钟意画画嘅咩？

阿琴：系啊，你呢？

凌凌漆：我马马啫，我劏猪嘅。??咩歌啊？

阿琴：李香兰。

凌凌漆：哦，张学友嗰首李香兰，我识，不过唔系好熟，李香琴我熟啲。

阿琴：是咩？我个名咪叫李香琴啰。

凌凌漆：你叫李香琴？

阿琴：系呀，我叫李香琴。

凌凌漆：哈——哈——哈，你叫李香琴，噉李香兰梗系你阿妈喇？

阿琴：系啊，李香兰真系我阿妈啊。

凌凌漆：哈——哈——哈——哈，李香兰是你啊妈？（顺眼一睇，地上有

烟头）你食唔食烟架？

阿琴：唔食。

凌凌漆：出嚟吖，（凌凌漆掹出枪，对准衣柜）出嚟啊！

凌凌漆（分析道）：你唔食烟，冇理由个烟头喺地下度，加上柜门虚掩，好明显有第三个人匿埋喺里面嚟！（拨开阿琴）你行埋一便，好危险啊。出嚟！（向衣柜踢去，腿卡住喺柜门度）

阿琴：（执起烟头）你系唔系食健牌架？

凌凌漆：喂，你点知架？

阿琴：烟头系你自己抌架。

凌凌漆：噢，Shit！

阿琴（打开柜门，取出凌凌漆刚放入去嘅鞋）：嚟吖，着番对鞋。（回头，却见凌凌漆端坐于梳化上。）

凌凌漆：经过咗舟车劳顿，无可否认，我系神经过敏咗少少，但系我可以大胆讲句，我绝对系一个优秀嘅特务嚟。

阿琴：嗯，畀番对拖鞋我先。

凌凌漆（将拖鞋除出递畀阿琴）：今次我接受国家嘅任务，亦都系有备而嚟嘅。（打开皮箱）嗱，好似呢个model嘅F40噉样，表面上系一个大哥电话，但你睇到呢度有一层金属网膜，实际上，（按一个钮）佢系一个须刨嚟嘅。（安然剃须）呢个系方便我哋出席一啲宴会场合，能够神不知鬼不觉噉刮须。（又攞出一个须刨刀）呢个model911表面上系一个须刨，实际上，（除帽攞住）佢系一个风筒（用“风筒”吹头）。

阿琴（手上攞起另一个风筒）：使唔使咁多风筒阿？

凌凌漆：风筒只系佢表面嘅掩饰，事实上，佢系一个须刨嚟嘅。问你死未？

阿琴：唔怪得知你咁靓仔啦。

凌凌漆：又唔好噉讲。

阿琴：噉你唔见咗个风筒呢？唔知点算呢，可？

凌凌漆（一耸肩）：哼，难我唔到，我并唔系浪得虚名。其实我着紧呢对鞋——都系一个风筒嚟嘅（吹风，梳头）你知啦，作为一个特务，仪表系几咁紧要得架。哎呀，唔该，有冇两粒笔心电啊？啱啱冇电添，真系。

阿琴：冇喎。

凌凌漆：算啦，由佢，迟啲先搞。

阿琴：我真系好想知道，你个咁优秀嘅间谍，系用咩枪，可唔可以借我睇吓？

凌凌漆（一笑）：唔怕失礼讲句，枪其实我唔系好在行，我嘅强项系：飞刀。

阿琴：飞——刀？（窗外天气骤变，雷电交加）

凌凌漆：冇错，飞系小李飞刀个“飞”，刀系小李飞刀个“刀”。（不约而同企起身）

（凌凌漆抽出飞刀，仿佛瞄准一米老鼠玩

具。一漂亮的出刀姿势后，刀却插在空墙上。）

阿琴：犀利。

凌凌漆：基本上——

阿琴（一摆手）：知架喇，言归正传啦。（攞出一箱武器）身为一个间谍，点都应该对枪系有啲认识嘅。呢支UFO来福枪，适合远距离狙击，射程两百米；呢种叫做224痰罐子弹，系我特别配制专用嘅。

凌凌漆：我钟意呢个名字。

阿琴：357左轮密林，配备有爆破子弹添啊。

凌凌漆：呢啲孔龙射唔射得死啊？

阿琴：噉就要揾只试吓先知喇。（阿琴喺暗处装上子弹）中国制PPK，系国内间谍专用，射程一百二十米，缺点就是声音太大，但系用埋呢个灭声器之后，杀人就可以无声无息啦。（琴装上灭声器，用枪指住凌凌漆）

凌凌漆：呢个唔知系咩嚟嘅呢？塞咗啲咩嘢喺里面？

阿琴：我谂系棉花啩。

凌凌漆：系棉花咁cheap嘅咋咩？（阿琴扣紧扳鸡）唔知厕纸得唔得呢，呵？

阿琴（放声大笑）：你靓仔得嚟，都几抵死嘅。

凌凌漆：睇唔到嘢嘅，喂。（阿琴欲扣扳鸡，此时凌凌漆却已旋下灭声器）都几骨致喎，唔知呢支啱唔啱呢。原来我支都啱用，可唔可以畀我试吓？

阿琴：好啊，你想点试吖？

凌凌漆：好大雨，等我闩闩窗先好嘛？

（阿漆将枪放喺台面，转身去关窗，阿琴攞起枪对准凌凌漆头开火，点知子弹却后射，射中自己右膊头。阿琴一声惊叫）

凌凌漆：做咩啊？你中咗枪嘅？

阿琴：试枪啊！

凌凌漆：呢支系倒后枪，一开就向后射架喇。

阿琴：你唔早啲讲！

凌凌漆：啲血系噉飙，等等我。（转过身，从箱中揾嘢，阿琴倒过枪口射击，点知都系射中自己左膊头，更大声地痛叫）

凌凌漆：你做咩啊？！

阿琴：我喺度试枪。

凌凌漆：又赖嘢咧？你做咩唔早同我啫，呢支枪全名叫做蛊惑的枪，向后射完再向前梅花间竹噉嚟加嘛。

阿琴：你唔早讲！

凌凌漆：啲血系噉飙，嚟吖，攞块胶布嚟粘住先啦，快啲。

（阿琴转身跑向洗手间，喺洗手间阿琴听到类似电话嘅铃声，揵开马桶盖，原来系司令嘅远程视频会议系统）

司令：阿琴，做咩你满头大汗噉？

阿琴：我啱啱冲紧凉啊。

司令：凌凌漆喺边啊？

阿琴：重喺度，但系你放心啦，我好快可以完成任务架喇。

司令：唔好喐手住，宜家计划有变，去到赖有为屋企，先至杀佢，噉就可以嫁祸埋畀赖有为，而且绝对冇人怀疑系我哋做嘅，等多一日添啦。

阿琴：吓？重等多一日？

司令：嗯？乜你成身血嘅？

阿琴：冇，我啱啱刷紧牙，流牙血啫。

司令：你用啲咩牙刷啊？扫把嚟架？

（凌凌漆推门而进）

凌凌漆：点啊，你？

司令：hi，凌凌漆。

凌凌漆（敬礼）：司令，喺个屎坑度都能够见到你，真系开心！

司令：点啊？你两个合作合作成点啊？

凌凌漆：好，阿琴个人人品好，又冇乜架子，做朋友真是一流。阿琴，你又觉得我个人点啫？

阿琴：你除咗靓仔之外我冇咩好讲。

凌凌漆：重有嘅，迟啲你就知喇。

司令：希望你哋两个早日完成任务。

凌凌漆（阿琴共同）：是（知道）。

（司令关闭系统，阿琴将马桶冚番住，并冲水）

凌凌漆：阿琴，攞番支枪先。

阿琴：唔该。

凌凌漆：唔好喐，等我帮你。（贴胶布）

阿琴：块药水胶布呢留番你自己用啦，我冇事呀，唔该！

凌凌漆：听我讲，以后真系唔好立乱试枪。

阿琴（向上顶连续射数枪）：我钟意试枪啊，得唔得吖？（吊灯跌落阿琴头上??）

初显飞刀绝技

（在香港一餐厅。阿琴头上交错叉贴住胶布）

凌凌漆：伙计。

伙计：系。

凌凌漆：你哋呢度啲豆腐花又话最出名嘅，你们这最有名的。

伙计：系啊。

凌凌漆：臭架喎。

伙计：出名臭吖嘛。

凌凌漆：噉唔该可唔可以攞啲出名好食嘅过我呢？

服务员：都系豆腐花啰。

凌凌漆：唔系啩？

服务员：系呀，你当佢臭豆腐噉食，观感就会fit晒。

凌凌漆（两人对笑）：噉畀多个炸嘅我吖。（对阿琴）香港嘅商场真系包罗万有啊，呵？

阿琴：系啊。

凌凌漆：你嘅枪伤冇大碍吖嘛？

阿琴：皮外伤啫。

凌凌漆：以后真系唔好立乱再试枪啊。

阿琴：早知跟你学刀啦。

凌凌漆：教你又唔敢，但我讲你听，真正刀法并唔系用手，你估用咩呢？系用道气，所谓以气御刀，当去到最高境界嘅时候，尘世间冇嘢系斩唔断嘅（阿琴听唔入，放低筷子）

凌凌漆：嗱你唔信，我攞把餐刀你试吓。

阿琴：唉，得喇，食嘢啦。

凌凌漆：琴，我睇你个样，唔系重嬲紧我系咪？

阿琴：傻啦，我点会唔嬲你啊？我绝对嬲你啦。

凌凌漆：唔系啩？有几嬲啫？

阿琴（阿琴摆手示意，凌凌漆将头伸过去听）：嬲到宜得一枪打死你。（两人相视一笑，此时闪光灯起，被人拍下刚才嘅情景。）

两人：僆仔，整咩啊，你啊？

摄影者：唔好紧张，唔好紧张，你两个一睇我就知道系艺术家嚟架啦，我家下喺度揾紧啲有关爱情嘅题材，头先见到两个嘅神态，就知道系沐浴喺爱河嘅情侣，所以先情不自禁但影咗落嚟，希望两位唔好介意。

（两人同时看照片）

摄影者（又拍一张）：嗰张相我送畀你啲吖，吓，呢张我keep吖，多谢两位。

凌凌漆：噉点好意思啊？（凌凌漆将照片递畀阿琴）

阿琴：唔好客气，你要吖。

（凌凌漆将照片放入衬衫袋。吐一口痰到邻桌嘅三人中嘅某人身上）

某人甲：先生，呢个痰系唔系你吐架？

凌凌漆：系啊系啊，冇错，点呢？有咩问题呢？

某人甲：哦，冇冇冇，得个知字啫。

凌凌漆：听你嘅口音，好似系湖南嚟个噃。

某人甲：系啊！

凌凌漆：噉大家同乡喇，湖南边处啊？

某人甲：东萍糊草头乡。

凌凌漆：我又系喎！

某人甲：咁乔？你系边条村架？

凌凌漆：上阳村啰。

某人甲：咦——啱喇，我哋几个都系喎！

凌凌漆：系啊？！（两人亲热地握手）

某人甲：哎呀，真系他乡遇故知喇！

食客（经过）：借借，唔该。

凌凌漆：村口呢，长期摆只狗喺度吠人加嘛。

某人甲：只狗咪我养嘅啰，后尾重无端端失咗踪添啊。原来畀人煲咗嚟食啊，啲骨头呢，重噉立乱抌喺村口度啊，真系冇阴功喇。我谂咁残忍嘅嘢唔会系你做架，系咪？

凌凌漆：吓？嗯??唔系唔系。

某人甲：块面红晒嘅？

凌凌漆：冇红，冇红，呵呵。

某人甲：笑得咁尴尬架？

凌凌漆：冇尴，唔尴尬，唔尴尬。

某人甲：我思疑系你做个噃。

凌凌漆：冇啊，唔??系

某人甲：真系唔系你？

凌凌漆：唔系??唔系

某人甲：真系唔系你做嘅？

凌凌漆：真系唔系咧，真系??

某人甲：唔系你？

凌凌漆：唔系，真系唔系??

某人甲：系咪你先？

凌凌漆：唔系啊??

（凌凌漆被几个连拉带扯快速带出餐厅）

凌凌漆：真系多谢晒喎。

某人甲：哎呀，唔好讲啲噉嘅嘢啦，一餐半餐你唔好咁客气，唔好咁客气啊，总之一句说话讲晒，我哋湖南人呢，就唔衰得嘅，吓，纵有一日就能够衣锦还乡。

凌凌漆：噉我都唔阻你哋喇，他朝有日再相逢嘅话，食早餐我请。再见。

某人甲：嗳嗳，唔好行住（转身抓住凌凌漆手臂，露出插喺腰间嘅手枪）不如噉啦，等埋我两个同乡过隔离攞少少嘢，好快返嚟，我哋周围行吓。

凌凌漆：多谢喇，我哋重有啲事要办??

阿琴：唔紧要，难得有机会同啲老同聚旧，咪倾吓偈啰，我都要去洗手间。

凌凌漆：又得啫。

（阿琴自信地走了，两位同乡到隔离首饰店打劫）

某人甲：湖南人之中你都算几靓仔喇喎，

哈。山东人长得你恁帅的还真少。（凌凌漆睇到有个人好似想偷袭）我一睇啊，就知道你个人系注重仪表架喇，其实你除咗顶帽仲靓仔。（原来嗰个人系同自己个仔玩）你以后唔好带咁多帽啊，以前我呢都系戴帽架，后尾有人话畀我听戴帽会秃头嘅，所以我就唔戴喇??只系攞一啲嘢，攞咁耐嘅？

细路老窦：（喺个仔后面厾咗一下）仔仔，点啊，仔仔，嬲老窦啊？次次都系你玩老窦，老窦同你玩一次都唔得？（同凌凌漆相视而笑）好啦，老窦同你买爆谷喇。

细路（好开心）：真嘅？好啊，快行咯！

细路老窦：哈，你个衰仔，又玩我！打你??

湖南老乡：（打劫完毕，又朝受伤倒下痛苦呻吟嘅店员开咗几枪）叫咗你唔好嘈架啦。

某人甲：哎，返嚟喇。

细路（自己喺度玩，对住空气）打！打死你??

警察（尾随而至，枪瞄准两个贼）：差人，企喺度！

（两人向警察开枪，楼内秩序大乱，激战

一阵）

某人甲（勒住凌凌漆）：唔好喐啊，大家同乡一场，帮我顶住先！

另外两个同乡（将小孩子劫住作为人质）：咪过嚟啊，冚家产！

（一警察中枪受伤）

另一警察：伙计，有冇事啊？（用对讲机）calling总台，calling总台！即刻叫白车嚟吖，有好多人中咗枪啊！呢度系皇室堡四楼，OVER！

老乡（劫着人质撤退）：行开！行开啊！唔好埋嚟??

小孩老窦（买咗爆谷返，个仔被抢）：德仔，德仔！

老乡：咪过嚟啊！过嚟打死佢啊！

细路老窦（跪地）：畀番个仔我啊，唔该你呀，我得一个仔咋！唔该畀番个仔我，你畀番个仔我我即刻走啊！我求你??

（德仔老窦上前去抢，畀佢哋用枪打中。三人退至电梯口，二人先走，留一人劫住凌凌漆）

老乡甲：睇住佢啊，其他环境我哋全部控制晒喇！

某人甲（用枪指住凌凌漆）：企喺度！

（镜头转向李香琴屋企嘅墙，阿漆把飞到原来插住一只乌蝇，镜头转回现场，凌凌漆腰间插住刀）

老乡甲（进入电梯，向同伴嗌）：走啦。

（凌凌漆猛然抽出刀，斜劈落去，寒光一闪，手枪已断，再一闪，鲜血四溅。凌凌漆戴上眼镜，附和着摇摇欲坠嘅歹徒）

同乡甲：阿雄，快啲。阿雄——，快啲呀！（两人攞起枪）阿雄——

（凌凌漆使出飞刀绝技，将两人解决。戴上礼帽，隐身而去。匿喺一边嘅阿琴睇到目瞪口呆，警察人员来收拾现场，被吓呆咗。

一警员：哇！玩杂技呀？

阿琴屋企嘅洗手间里面

阿琴（对住马桶）：我初头谂住自己唔使喐手，可以借刀杀人，点知——计划失败咗。

司令：你冇收到我嘅命令咩？几时轮到你自把自为啊？

阿琴：我知，但系，我真系好想知道凌凌漆，究竟系一个咩人。

司令：收声！你以咩身份来问我啊？他系咩人关你咩事？记住，你阿妈系汉奸，你老窦系走狗，你阿爷系卖国贼，你就系汉奸、走狗、卖国贼，呢样嘢系天生嘅，冇得改变嘅！当年冇我收留你，你早就陪埋佢哋去打把。你条命系我嘅，我叫你做乜你就照做！清唔清楚？??阿琴，我知道你个人有时心肠实在太软，你知唔知凌凌漆系个咩人嚟架？系衣冠禽兽，佢以前无恶不作，专强奸大肚婆，非礼细路女。（举起一幅图片）你睇吓啲细路女几咁细个，呢啲大肚婆个肚几咁大，全部系畀佢糟蹋嘅。你呢次唔单止系为我，直程系为民除害！重有咩问题？

阿琴：冇嘞。

司令：好！噉听日照原定计划，喺赖有为屋企落手。

阿琴：知道

（凌凌漆喺外面，试图打开厕所门，开门

后凌凌漆企喺门边身着一条底裤再披一件寿袍，口里含住烟斗，手里转住两个健身球）

凌凌漆：你冇嘢吖嘛，你？

阿琴：咩事？

凌凌漆：冇，我见你闩埋度门喺度咁耐，我敲极门又冇人应先斗胆撞门入嚟睇吓啫。（走入冲凉房）咦，冲紧凉啊？

阿琴：系，我冇事，唔该闩番度门。

凌凌漆：嗯（从里面将门关上）真系估唔到今日会发生件噉嘅事。

阿琴：我系叫你返出去，然后同我闩番度门。

凌凌漆：Oh,yes,well,Iamsorry...

阿琴：出去呀————————————

(凌凌漆出门，阿琴到门边，凌凌漆又入嚟)

阿琴：你想点啊？

凌凌漆：做唔做啊？

阿琴（好惊）：做咩啊？

凌凌漆：做帛金。

阿琴：做咩帛金呀？

凌凌漆：德仔老窦。

阿琴：边个德仔老窦呀？

凌凌漆：今日喺商场无辜嗰个死难者。

阿琴：做帛金？

凌凌漆：攞去报馆交畀阿德仔屋企得唔得呢？

阿琴：得啩。

凌凌漆：署名用无名氏好定有心人好呢？

阿琴：是但啦。

凌凌漆：大家萍水相逢，又唔系咁熟，做住五嚿水表吓心意啦，好唔好？

阿琴：你话事吖。

凌凌漆：我嗰五嚿水你帮我出埋啦，好嘛？

阿琴：你唔系嘛？

凌凌漆：我完成咗呢个任务有五嚿水奖金，到时还畀你啦。

阿琴：吓——？

凌凌漆：得架喇，帛金嘅嘢唔会走你嘅。

阿琴（犹豫，惊慌）：哦。

去赖有为屋企前

（车上）

阿琴：呢个赖有为，专走私国宝，恐龙头骨嘅失踪九成同佢有关（递照片畀凌凌漆），叉住腰呢个就系佢喇。阵间你见机行事，重有咩问题？

凌凌漆：有啊。其实李香兰系咪真系令寿堂呢？因为据我所知，佢系一个汉奸。（见阿琴唔高兴）对唔住，当我冇问过。

阿琴：时间差唔多喇，落车。

（两人落车）

凌凌漆：阿琴，如果今天能够完成任务嘅话，我就走架喇，所以睇吓你钟意啲咩，我送畀你。

阿琴：唔使喇。

凌凌漆：要嘅。

阿琴：白玫瑰吖。

凌凌漆：Youareveryromantic！

阿琴：或者我送畀你呢。

凌凌漆：veryromantic！（将箱子平着放于地上，一只脚踏上去）如果今晚重有时间嘅话，不如我哋到香港嘅卡拉OK度观摩一下。

阿琴：（递个通话器畀凌凌漆）你喺入面，我会同你保持联络。

凌凌漆：唔讲你唔知，我唱起歌上嚟把声同阿学友把声一摸一样，嗱，你睇个喉核又会上下噉戳！

阿琴：（递锁匙畀凌凌漆）呢条后门锁匙，快啲啦，冇时间喇！

凌凌漆（接过锁匙）：我唱歌你听吖，就

唱你老母李香兰。

阿琴：我话畀你听啊，我逼不得已先同你企埋一齐，你唔好再喺我面前提李香兰，唔好再喺我面前唱歌，唔想听到你喺度乱噏啊！（一拳打落凌凌漆脸上）

凌凌漆：你呢种爱恨分明嘅性格我真系好欣赏。（阿琴嬲到背过身去，凌凌漆将钥匙掉到身后）呢条锁匙我唔需要（另一只脚亦踩上箱度）喺我脚底下呢个箧并唔系普通嘅箧，而系“箧中之神”，简称“箧神”。佢可以将我安全又潇洒噉输送到赖有为屋企度。

（“嘀”一声响，凌凌漆腾空而起）

凌凌漆：箧——神——。（喺空中翻筋斗，落地一睇仍系原处）嗯！你入嚟做咩啊？你想点呀？

阿琴：你问我想点？我问你想点啊！

凌凌漆：（一睇个箱）Oh，Shit！未校角度，所以直上直落噉解嘅啫。宜家得喇。（揿一下按钮，向斜前方冲去）箧——，唉呀（撞落墙度。）

阿琴：度门开咗架喇，入去啦。

凌凌漆：阿琴，即系我呢就唔系浪得虚名嘅。

阿琴：抹咗啲血先讲啦。

凌凌漆：好啊，又得啫。睇嚟个箧系摆错咗少少位，移番正佢冇事架喇。（摆正位置，企上去）

阿琴：喂！你唔好嘥我时间得唔得啊？

凌凌漆：得嘅咧，畀多次机会我。箧——神———

（凌凌漆成功咗，真系入咗赖有为屋企）

赖有为屋企

凌凌漆（打咗个响指）：DryMartine，唔该！

（服务员攞过嚟，却被一位女士攞走，两个面面相觑）

凌凌漆：望咩啫，攞过杯嚟啦，望。离晒谱嘅你都，望——喎！唉。

阿琴（喺外面装枪）：阿漆，入面咩环境啊？

凌凌漆（睇住自己左边跳吓跳吓着泳衣嘅女仔）：好凶险，呢度啲宾客呢个个都凶神恶煞嘅，但系又好好相语喎，真系讲你都唔信呀。

服务员（自助肉食前）：先生，你呢？

凌凌漆：呃——我自己嚟啦，唔该！

（凌凌漆抽出自已把猪肉刀剁肉，剁好一嚿攞走是发现目标赖有为，正喺度接电话）

赖有为：喂？（示意两边美女离开，自己进入室内）

凌凌漆（用对讲机讲）：发现目标。

凌凌漆跟到门边，调好接收器）

赖有为：嗱，小心听住吓，骨头呢，要??

（凌凌漆接收器里出现噪音，听唔清）

赖有为：听住啊，我讲多一次，啲猪骨呢要出出水佢，去咗啲肥膏先，然后花胶就将佢熬成个钟头。

电话里面嘅人：噉你几时番嚟饮汤啊？

赖有为：得喇，呢啲嘢你唔好烦我啦，我老婆重喺入面架。

（凌凌漆接听到足球广播直播，阿叔把声：??罗马里奥交畀白必图，必图凭住个人技术连过两关，一射入网啊！??）

阿琴：阿漆，点啊？听到啲乜野？

凌凌漆：初步相信，有个叫白必图嘅偷咗恐龙骨，跟住重用佢嘅个人的技术连过两关然后一射入网，但系呢度嘅信号好微弱，（唔知喺边度攞咗一把锤同螺丝批）家下我谂住可唔可以喺呢度掘条隧道入到佢梳化椅底听吓佢讲咩。

阿琴：（喺度瞄准紧）阿漆，唔好咁多废话，快啲行去另外一个接收得好啲嘅地方。

凌凌漆：行来行去电波都重系干扰住，硬系听唔清楚赖有为喺里面讲紧咩。

阿琴：阿七，你试吓行去一笪冇咁多人嘅地方。

凌凌漆：我前面有个钢琴位，冇乜人。

阿琴：你行过去试吓。

凌凌漆：好啊。（大步走到钢琴前，坐低，左右摇动）都重系收唔清楚。

阿琴：咪两头喐啦，坐定，得架喇，（瞄准）啱晒。

凌凌漆：一个人坐喺度，真系觉得有多少尴尬。

阿琴：你唔系好钟意唱歌嘅咩？咪唱首歌啰。

凌凌漆：都好喎。

凌凌漆（弹琴）：

夜雨冻，??照片中（对对讲机）呢句唔记得歌词

回头似是梦，无法弹动，

留住凝望你，退色照片中，

啊??像花虽未红，如冰霜不冻，

却像有无数说话，可惜我听不懂，

啊??是杯酒渐浓，或我心真空，

何以感震动——。

凌凌漆：点啊，得唔得啊？

阿琴（感动到呆晒）：麻麻地吖。

凌凌漆：系噉意畀啲意见啦。

阿琴：振音差噉啲。（阿琴放低枪，若有所思）

（一阵乱花碎影闪过，凌凌漆被长发女提到胸前）

长发女：你简直系出类拔萃。

凌凌漆（向后一睇）：使得出呢招移形换影嘅功夫，睇嚟你都并非等闲之辈。

长发女：唔怕坦白同你讲，其实我喺度等紧个好重要嘅人，我谂呢个人你都识嘅。

（长发女攞出一张照片畀凌凌漆睇，正系嗰日喺餐厅嗰个艺术家所拍嘅嗰张相）

凌凌漆：对唔住，无可奉告。

长发女：我从来唔勉强人嘅，不过有样嘢我好想话畀你听，我真系好欣赏你（上前亲吻

凌凌漆快面，同时凌凌漆睇到一个铁人缓缓喺屋顶行走，并拧断一支路灯柱）Iloveyou!

（铁人将柱子将凌凌漆掷去，凌凌漆及时避开，定睛一睇，长发女掹枪欲射自己，跳到台后面。场内秩序好乱，长发女开枪射击。凌凌漆番起红台布，台布落下人已消失，长发女侧身一睇，凌凌漆掹出飞刀，击中佢手腕，女子逃走。凌凌漆都逃走，点知枪声响起，对住佢射）

凌凌漆：阿琴，收唔收到，呢度好危险！好多杀手唔知匿喺边度？

（阿琴正喺度开枪，射中咗赖有为，凌凌漆匿入树荫里面，点知又跑番出嚟）

阿琴：（心里谂）咁大只蛤乸随街跳？

（凌凌漆伸手向草木丛中，阿琴继续瞄准射击，击中凌凌漆身体多处。阿琴奋力跑去车度，将枪放到车后座，上车正要开钥匙打火，车门被撞开，阿琴吃惊大叫）

凌凌漆（喘气）：我中咗枪。

阿琴：中咗枪你重咁行得嘅？

凌凌漆：好在有避弹衣，不过最衰冇避弹

裤。

（阿琴欲摸手枪行事，凌凌漆却递一支白玫瑰畀佢）

凌凌漆：畀你嘅。

阿琴：做咩啊？你喺边度攞架？

凌凌漆：正话临走见到摘嘅，我呢啲唔系度度有架，算你好彩。

（阿琴接过沾满鲜血嘅鲜花，回想起刚才凌凌漆伸向花草丛中嘅画面）

阿琴：你使唔使咁认证啊？黐线架？

凌凌漆：你点知架？好多人都系噉讲喎。不过，金枪人嘅杀手重喺里面，我哋快啲开车先讲，快啲呀！

（发动之后，汽车却被抬起）

阿琴：啊——咩嚟架？（原来系铁人）

凌凌漆：冇有怕，有我喺度啊，定啲嚟吖。（控制方向盘）

阿琴：跛咗你好坐低啦，等我嚟。（阿琴

向铁人开枪，铁人避枪放低部车，用拳向车窗打落去）

凌凌漆阿琴：撞佢老母！（撞低铁人后逃去）

铁人：哼！算你哋走得快。

睇咸片攞子弹

（返到阿琴阿琴屋企，阿琴拖住凌凌漆，地上一长条血痕，琴关上门）

阿琴（嗍气）：点啊？

凌凌漆（喘气）：纱布、棉花、铰剪，有冇啊？

阿琴：（睇住握手中嘅白玫瑰，沉思片刻）有！

（阿琴到厕所攞工具，司令嘅铃声响起，出现司令嘅样，阿琴冇理会，冚上马桶盖）

阿琴：揾唔到铰剪啊。

凌凌漆（掹到出嚟，寒光一闪）唔使喇。（凌凌漆欲举刀，却无力，刀插喺地板上）粒子弹射咗入我大髀骨，压住我条大动脉，迸住

条三叉神经线，宜家我左边脑开始缺氧麻痹，右半身开始瘫痪，（撕开条裤，露出伤口）一定要劏开个伤口攞番粒子弹出嚟先得。

（阿琴出力掹刀，但系掹唔出）

凌凌漆：等我嚟。（用力掹出刀，划着一条火柴，烧刀刃）呢把刀系当年嘅铸剑天王干将莫邪嘅御用菜刀，用天山寒铁所铸成，净重七七四十九斤又十六两零四安士，普通人唔系咁易攞得起嘅。（用刀割伤口，好痛苦）呢下好考功夫，因为要避开所有神经线同埋血管，帮我擘开个伤口佢吖。

阿琴：吓？

凌凌漆：顶唔住呀？

阿琴：顶得住。

凌凌漆：见唔见粒子弹啊？

阿琴：黑色嗰嚿？

凌凌漆：唔系，黑色嗰嚿孖筋嚟啫，冇鬼睬佢吖，上少少吖。

阿琴：白色嘅？

凌凌漆：系，白色嗰度就系骨，隔离银色嗰粒就系子弹喇。

阿琴：我睇到嘞，攝得好入啊！

凌凌漆：（从桌上攞出锤、螺丝批）帮我凿佢出嚟。

阿琴：凿？！

凌凌漆：凿。

阿琴（空中锤敲螺丝批）：就噉凿？

凌凌漆：唔系点凿啊？

阿琴：你唔使麻醉架？

凌凌漆：（一定神）要。（摸出一盒录像带）揿着饼带佢吖。

（阿琴放盒录像带，画面上却系咸片）

阿琴：你唔系入错带系咪？

凌凌漆：冇，呢招叫做转移视线分心大法。

阿琴：这招分明叫老汉推车，你唔好当我唔识嘢喎。

凌凌漆：我系讲紧我呢个方法，系古代神医华佗所用嘅麻醉大法。古时有关云长全神贯注捉象棋刮骨疗毒，今日有我凌凌漆聚精会神睇咸带凿骨攞弹头，开始——（见阿琴望住电视机发呆）迟啲先睇吖！

阿琴：哦。

（咸带里面发出鬼妹叫床声，阿琴一路帮凌凌漆凿骨）

凌凌漆：噢——，嗯——

阿琴：啲骨头同子弹太近喇，隔离重有好多神经线，好痛啊，你忍吓。

凌凌漆：黑人都有啊？嗯——。（电视里面鬼妹：嗯——啊——）做咩停晒手啊？（向下一睇）噢，我专登将全身嘅血扯埋一齐集中喺一碌，以免佢失血过多嘅啫。唔好理埋啲无谓嘢，继续啦。

阿琴：佢遮住我视线啊，你拨开佢吖。

凌凌漆（拨开衫）：Yeah！Comeon！大力啲！（阿琴用力一击）大力啲——

阿琴：做咩啊？太大力啊？

凌凌漆：我唔系你讲啊，我同个黑人讲架咋。

阿琴：Sorry，sorry。（阿琴挖时鲜血飞溅）咁多血嘅？

凌凌漆：哦冇，你凿断咗我条血管啫。

阿琴：噉点啊？你继续睇咸带吓！（凌凌漆面容憔悴，鲜血流到满地都系）你顶得住吖嘛？？

凌凌漆：同我倾吓偈，问吓我嘢，总之唔好畀我瞓着，因为瞓着咗我惊唔会再醒。

阿琴：你叫咩名啊？

凌凌漆：我叫凌凌漆。可以问啲深啲嘅。

阿琴：深啲啊？有个农场，鸡嘅数目就系鸭嘅四倍，噉呢鸭呢就比猪少九只，噉鸭加埋猪嘅总和就系六十七，噉请问成个农场啲动物加埋有几只脚？

凌凌漆：都系等我问你啦。

阿琴（喊）：你问啦。

凌凌漆（一侧目）：嗰幅画里面一男一女系边个嚟架？

阿琴：我爸爸我妈妈。

凌凌漆：点解唔见样嘅？

阿琴：细细个，死咗喇，冇咩印象。

凌凌漆：噢，Iamsorry，原来大家都系孤儿，唔怪得咁好倾啦。阿琴，唔该晒你呀。

阿琴：唔好客气，你顶住唔好死啊！

凌凌漆：可唔可以熄熄冷气呀？有啲冻。

（阿琴象画中人物一样，同凌凌漆相携而坐。阿琴攞出弹头，将火药倒到伤口上，点燃火柴。阿七

一声惨叫，应声晕倒）

阿琴：阿七，七啊！阿七！

凌凌漆（突然弹起）：掂晒（阿琴吓得一跳），不过如果讲消毒止血，呢招真系万试万灵。

（阿琴前去拥抱阿七，阿七睇到台上嘅子

弹）

凌凌漆：点二二四痰罐仔子弹，听讲系你专用个喎，你支UFO长脚型来福枪一定重喺出面架车度咧？（阿琴变色，松开拥抱凌凌漆嘅双手）其实系你开枪打我嘅，系唔系？（凌凌漆挨住喺张椅上）要杀我做咩又救我啫？（阿琴望住地上嘅白玫瑰摇头）金枪人同你究竟咩关系？

阿琴：你唔使问，我咩都唔会讲。身为一个间谍，既然杀你唔到嘅，结果只系得一个，（掉支枪畀凌凌漆）嚟吖！

凌凌漆：好啊。（执起枪，举枪将阿琴身后嘅碟打碎）咁近都射唔中，唉，枪法真咂苲。（拾掇行李）冇办法，唉，（从录像机攞埋饼咸带出嚟）打打杀杀唔好烦我，我睇咸带好过。（点烟，着衫走人，出门临别一句）当我冇见过你啦。

（阿琴端坐，若有所思，突然跑向门口，开门，一见是“阿七”）

阿琴：阿七！（抱住阿七）你唔好走啊，你唔可以返去架！其实总司令就系金枪人，嗰嚿恐龙骨??（觉得唔对路）乜你高咗嘅？

假阿七：哼，你终于都讲出真相喇咩！（一

揭脸皮，原来是赖有为屋企嘅长发女）你真人瘦过张相咁多嘅？做汉奸揾唔到食啊？唔系呀嘛？

（长发女掹枪，阿琴想逃走，铁人破窗而入，满身玻璃，将身上嘅一块放入口食）

铁人：小姐，有冇药水胶布啊？

长发女：睇你个样真系好鬼死可爱，难怪我哋陈司令都死喺你手上啦。

铁人：我想见一见你总司令，麻烦你带一带路，嘿嘿??

喺刑场上

（凌凌漆返到大陆，背景系一块“四有新人”嘅宣传牌。嚟到司令办公室）

司令：你知唔知道，原来阿琴出卖咗国家！

凌凌漆（摇头）：唔知。

司令：国家咁信任佢，佢竟然??系边个打伤你嘅？

凌凌漆：我谂系金枪人做嘅。

司令：噉阿琴呢？阿琴去咗边度？

凌凌漆：唔知，佢失咗踪。

司令：嘿！（普通话）真是（唔知佢噏乜）？敌人也太狡猾了，居然可以无孔不入！哎，你的伤口现在怎么样了？哈？

凌凌漆：应该都（普通话）没有问题??

司令：（普通话）什么没有问题，你还在流血嘛，来，（递本簿畀凌凌漆）你赶快签了它，跟着你就去医院看医生了，疗伤要紧！小伟，马上送他去医院。其他那些暂时不用担心。

警卫（开门后对凌凌漆）：呢便吖。

（凌凌漆被带出屋外，路过刑场）

李力持：望咩啊？过嚟吖！等紧你啊！

凌凌漆：呢个时候打靶都有嘅？唉，运路行吖。

警卫：唔使喇，到喇。

（凌凌漆被强行戴上手铐）

警卫（掹出凌凌漆把刀）：都几重手喎。

凌凌漆：喂！做咩事啊？做咩事啊？

警卫：冇嘢冇嘢！

凌凌漆：，冇嘢你都讲得出口嘅？喂宜家我有嘢喎（警卫用绳绑起阿七）喂！

警卫：咪喐啊。

凌凌漆：喂你有咩讲清楚好喎。

警卫：得架喇。

刑长：凌凌漆，亲自签字承认走私贩卖国宝，罪无可恕，无需审判，即是枪决！

（漆想逃走，被鸣枪警告）

警卫：返埋去！

凌凌漆：嗱咪住先啊嗱，我冤枉架??

黄一飞：嗱咪住先嗱我冤枉架，我根本就冇偷睇到国防机密，你哋做人要哋良知先得架。系人都知道我盲加嘛，你哋居然屈一个盲人，话佢偷睇国防机密咁离谱??（枪声响起，中弹倒下）

凌凌漆：各位手足，我同阿陈局都好熟架，间唔中呀饮吓茶添啊??

犯人甲乙：咪住啊！咪住啊??我老窦就系陈局长，你杀我，我叫佢杀番你架。

刑长：预备！（其他人举枪瞄准）

犯人甲乙：唔好啊??

犯人甲：我咁靓仔——我唔想死啊——

犯人甲乙（痛哭）：哇——啊——（中数枪后倒下）

刑长：你个扑街吖！喊得你咁样衰！咁样衰！（上前又补数枪）

李力持：死得好啊！

刑长（打枪后再用枪大力打尸体）：下一个。

（凌凌漆下意识将脚尖铲入泥土，准备逃走，一睇李力持都系噉做）

李力持：三十年嘅若练，今日终于大派用场。

刑长：预备。

李力持（大笑）：想杀我铁腿水上飘？！冇咁易！（铲土泼向枪手，跃起又落地，地上形成

两道沟，又顺住墙头飞去，越飞越远，一声追魂炮，李力持爆炸了，手攞炮筒嘅士兵完成任务后向刑长行咗个礼。凌凌漆目瞪口呆）

刑长：预备。

（凌凌漆吓到跪低）

刑长：行刑！

最后决斗

（仓库内，集装箱内系恐龙骨，士兵关上箱门）

司令：三十分钟内将货物送到边境货运站，买家喺嗰便接应。

卫兵：是。开车。

（正要开车，车玻璃被打烂，伸出一手捻住司机条颈。原来系铁人，两个司机都被打倒）

陈宝莲：你嘅买家已经死咗嘞，恐龙头骨亦都唔使麻烦你，我们会自己运返沈阳。（显出拘捕令）精精地束手就擒，否则格杀勿论！

铁人：金枪人，（带出李香琴）我哋连你嘅得力手下都已经捉埋嘞，你快啲投降罢啦。

（司令快速掹枪射击李香琴数枪，李香琴惨叫倒地）

阿琴：小叭喇——（起身）你重系人嚟嘅？好彩我着咗避弹衣啫！枉我同你出生入死，问都唔问讲都唔讲你就噬我？好，你噬我吖嘛？（对长发女同铁人讲）噬佢！

（仓库内激战，司令边战边退，阿琴开火爆炸，很多士兵被炸）

阿琴：佢做初一，我做十五。好！我同你哋合作，我知佢喺边，跟我嚟吖！

（司令穿过几道机关，入到自己办公室，攞出铁甲衣，铁人撞穿墙而过）

司令：嚟啦，我等紧你哋。（射击）

阿琴：小心啊！（三人被轰倒）

司令（上子弹，瞄准阿琴）：着避弹衣都

射死你！

（三人又被轰倒，阿琴腿部俾嘢压伤，铁人举起钢箱掟向司令，司令闪过，铁人上前攻击司令，被射伤手臂，长发女见到铁头受伤，好心痛望住）

铁人：唔好望喇，快啲出绝招啦！

长发女（走上前去，铁奶罩伸出两条长管）：高热火焰！（喷出电焊火）睇你个盔甲顶唔顶得住我三万度嘅高热火焰！喝——（重未叫完，火就熄咗）

铁人：哎呀弊喇，Sorry啊，寻晚煮公仔面做宵夜，用咗你啲石油气冇通知你，唔好意思，唔好意思。

长发女：（大惊失色）吓——？

司令（开枪，长发女粉身碎骨，剩番两个铁奶罩从空中跌落嚟）玩火吖嗱？波都打爆你呀！金牙佬，轮到你喇！

铁人：咪当我流至得架！铁——甲——飞——拳（铁拳头飞出）

（司令被击中向后飞，巨大嘅力量使司令撞倒三埲墙。同时佢开咗一枪，铁人被粉碎，

剩低一棚金牙）

司令（将铁人嘅飞拳从心口掹出，行到阿琴前）枉我供你读书，畀饭你食，估唔到你会为咗一个猪肉佬背叛我！（阿琴向司令搏命开枪，但系对司令嘅铁甲毫无影响）凌凌漆头先已经啱啱打靶死咗喇，你咁钟意佢，我就送你落去培佢啦！

（司令举枪指住阿琴，此时背后有凌凌漆嘅身影出现）

阿琴：阿漆！

（睇真啲，原来系达闻西，阿琴好失望）

达闻西：哼！我一早睇穿你嗰笼嘢架喇。

（此时有一只手从闻西头上攞走顶帽自己带上，原来系凌凌漆）

凌凌漆：一早睇穿你又唔早讲！

司令：凌凌漆？

阿琴：阿漆，你冇事呀？

凌凌漆：得喇，我冇事。啲对白唔好咁例牌吖，唔该。

司令：你唔系拉咗去打靶嘅咩？

凌凌漆：讲起火都嚟添啊，你累我唔见咗一嚿水。（回忆用一百文收买行刑官兵嘅镜头??）所谓上梁不正下梁歪，估唔到你嘅手下重贪过你，亏你重有面企喺“忠党爱国”四个字之前，总之中国一日有你呢个大魔头，啲老百姓都唔会有好日子过。我今日一定要做瓜你。

司令：就凭你两个废柴？

达闻西：废柴？（除咗面衫）我费一生精力，集合十种杀人武器于一身嘅——超级武器霸王，产品编号攞你命3000，经已研究成功咗喇！阿漆，企埋啲！（阿漆退后）远啲！（阿漆继续退后）再远啲！（阿漆跑开好远）

司令：系咩？我真系想见识吓。

达闻西：攞你命3000——！（攞咗一搊烂嘢出嚟）西瓜刀、单车链、火药、硫酸、毒药、手枪、手榴弹、三角锉??每样都系独当一面嘅，家下集合埋一齐，问你死未？

司令：嗯，你呢个黐线佬都系早死早着。（举枪指向闻西）

达闻西：唉！咪住！

（此时司令已经开枪，子弹穿过闻西只手，闻西受伤痛苦靠墙坐低）

凌凌漆：闻西！

达闻西：阿漆，靠你喇。（晕倒）

凌凌漆（除面衫）：既然系噉，冇办法喇，我唯有单刀附会啦。（从腰间掹刀出嚟）

司令（除面罩）：猪肉刀？哈哈??（凌凌漆跟住笑）猪肉刀呀??哈哈??

（凌凌漆行向司令，司令一路笑一路上子弹，突然开枪）

阿琴：唔好啊！

（凌凌漆用刀挡住子弹，向后滑行好大一段距离，一睇，子弹嵌入刀中，阿漆冇事，司令非常惊讶，阿琴非常开心。阿漆继续行向司令，司令再举起枪，阿漆突然将飞向司令，司令马上开枪。一阵烟气过后，司令见凌凌漆正向自己走过嚟）

司令：（普通话）你他妈的臭小子，看一看你有多大本事！（一路讲一路上子弹，凌凌

漆正在运气）让你瞧瞧我的厉害！

（凌凌漆运气，将刀从地下吸起到手上，跳起尽力向司令一劈，然后摆咗个pose）

司令（除面罩）：（普通话）你这把什么刀？

凌凌漆：猪肉刀啰，专斩畜生嘅。

（司令嘅金枪断开两段，向阿漆背面走去，突然跪低，铁甲裂开，倒下。阿漆摆咗个好有型嘅姿势将刀插入腰间刀套中）

尾声

（深圳某一市场猪肉摊前，只见猪肉摊左遥右摆，冇人做生意）

买菜北姑：喂，猪肉佬啊，畀五文猪肉嚟吖。

凌凌漆（从下面伸个头出嚟，一路嗍气一路讲）：喂，唔做生意住喇，个零钟头之后再嚟过啦。

买菜北姑：你得唔得啊？睇你咪最多三分钟，猪肉佬。

凌凌漆：三个钟未必得啦。

阿琴（都从下面伸个头出嚟）：漆啊，不如返屋企先搞吖。

凌凌漆：费事两头行啦，况且呢度环境好啲。（对北姑）去！去！（继续搞）

（突然电子通讯器响起，达闻西喺显示器上出现）

达闻西：阿漆，呢次大镬喇！我哋个间谍卫星喺外太空失咗踪啊。呢次关系到国家安危，十亿人民嘅生“屎”（死），而且我又扎咗职，你都唔想我孭镬架，帮帮手快啲返嚟啦。

凌凌漆：家下搞紧儿女私情，国家大事啲湿碎嘢借歪先啦，闻西。

达闻西：哎呀，我讲过好多次啦，系达——闻——西呀??

（未讲完阿漆就将显示器关咗，将遥控器向后掟，继续搞嘢。此时，摇动嘅砧板上插住凌凌漆嘅猪肉刀，刀上写住：民族英雄——小平赠）

（剧终）